एउटा शक्तिको अगाडि
तिम्रो आस्था नभए पनि
आस्था छ भनी वचन दिनु पर्छ
या त प्रमाणको लागि लेख्नु पर्छ
बाँच्नु कति प्यारो हुन्छ
जहाँ भने पनि जानु पर्छ
जे मागे पनि दिनु पर्छ
हो मा हो भन्नै पर्छ
या त आज्ञापालक सिपाही जस्तै
गोली खाएर मर्नु पर्छ
एउटा शक्तिको लागि
मानौं पोप उभिएको छ
बाँच्नु कति प्यारो हुन्छ
फाँसीमा जानु नपरोस भनी
पृथ्वी गोल भए पनि
हामी ग्यालिलियो बन्यौं भने
पृथ्वी चेप्टो छ भन्नै पर्छ
यात झुक्न नजान्ने शहीद जस्तै
गोली खाएर मर्नु पर्छ
